Papa Benedikti ka shprehur “zemëratë, tradhti dhe turp” të premten, mbi abuzimet me fëmijët të priftërinjve në Irlandë, për të cilat liderët e Kishës thanë se do të ndezin një tronditje të Kishës Katolike Romane Irlandeze.

Burimet e Kishës bënin me dije se prisnin që disa peshkopë të jepnin dorëheqjen pas raportimeve të qeverisë se liderët e Kishës në Irlandën me maxhorancë katolike, kishin mbuluar një abuzim të gjerë të priftërinjve me fëmijët për mëse 30 vjet.

"Mendoj se ne do të shikojmë një riorganizim thelbësor të Kishës në Irlandë",- tha kryepeshkopi i Dublinit Diarmuid Martin pasi ai dhe liderë të tjerë kishtarë mbajtën një takim emergjence me Papën.

Vatikani tha se Papa do t’i shkruante popullit irlandez mbi krizën dhe planin e veprimit, në një lëvizje të paprecedentë të një dokumenti të Papës drejtuar ekskluzivisht abuzimit të klerit me fëmijët.

"Ati i shenjtë ka të njëjtin zemërim, tradhti dhe turp të ndjerë nga shumë besimtarë në Irlandë, dhe i bashkohet atyre në lutje në këtë kohë të vështirë të jetës së Kishës," thuhej në deklaratën e Vatikanit.

Irlanda ka qenë në një gjendje shoku që prej publikimit të raportit të Komisionit Murphy dy javë më parë.

Dokumenti thoshte se Kisha, "në mënyrë obsesive", kishte fshehur abuzimet me fëmijët në kryedioqezën e Dublinit nga vitet 1975 deri 2004 dhe kishte vepruar me politikën e "mos pyet, mos trego."

Një numër peshkopësh që punonin në Dublin gjatë periudhës së mbuluar nga raporti, ka gjasa të ofrojnë dorëheqjen e tyre, njoftonin burimet e kishës.

Dokumenti i Vatikanit i referohej, kësaj duke thënë se Vatikani do të shqyrtonte çështjen në lidhje me qeverisjen lokale të Kishës me përgjegjësinë më të madhe për kujdesin pastoral të fëmijëve”.



"Pendesë e thellë"



Në raport thuhej se Papa, i trazuar e i shqetësuar thellë, shprehu "pendesën e tij të thellë për veprimet e disaanëtarëve të Klerit që kishin tradhtuar premtimin solemn ndaj Zotit, si dhe besimin e dhënë ndaj tyre nga viktimat e familjet e tyre, si dhe nga shoqëria në tërësi”.

Martin tha: "Mendoj se vërtet kemi nevojë për rinovim."

Ai tha se përtej "punës së përkushtuar për mbrojtjen e fëmijëve," Kisha Irlandeze duhej të rinovonte jetën kishtare dhe të përfshinte qytetarë jashtë Kishës në organizimin e saj.

Raporti thoshte se kryepeshkopët e Dublinit gjatë peiudhës në fjalë kishin pasur dijeni për disa ankesa, porse dioqeza kishte qenë më shumë e zënë me ruajtjen e reputacionit të Kishës sesa me ruajtjen e mirëqenies së fëmijëve.

Roli i rëndësishëm i kishës në jetën irlandeze është një arsyet kryesore pse abuzimet e një minorancë priftërinjsh kaluan pa u kontrolluar, shkruante raporti.

Një nga priftërinjtë prnoi abuzimin me më shumë se 100 fëmijë. Një tjetër tha se kishte abuzuar fëmijët çdo dy javë për afro 25 vjet.

Raporti Murphy erdhi gjashtë muaj pas lëshimit të lajmeve të ngjashme për rrahje me kamxhik, punë skllavërore dhe përdhunime në masë në shkollat industriale të menaxhuara nga Kisha në Irlandë në shekullin e 20-të, që tashmë nuk ekzistojnë më.

Ai raport akuzonte zyrtarët shtetërorë dhe policinë si bashkëpunues në mbulimin e skandalit, duke gërryer më thellë autoritetin moral të një institucioni që ka dominuar jetën sociale irlandeze për shekuj me radhë.

Kritikët dhe të afërmit e viktimave thonë se Vatikani dhe Kisha ende nuk i janë afruar një trajtimi të duhur me të dyshuarit për abuzime me drejtësinë civile.







E Shtune, 12 Dhjetor 2009