Një hoxhë francez, aktivist i dialogut të myslimanëve me hebrenjtë, ka mbështetur ligjin e ri për ndalimin e vellove të fytyrës, duke u distancuar kështu nga shumë liderë myslimanë në Francë, që kanë bërë thirrje për parlamentin të mos votojë projektligjet e “ndalimit të perçeve”.

Hassen Chalghoumi, xhamia e të cilit gjendet në veri të Parisit ku jetojnë shumë muslimanë, tha se gratë të cilat duan të mbulojnë fytyrat e tyre duhet të shkojnë në Arabinë Saudite ose në vende të tjera myslimane ku kjo modë është traditë.

Asambleja Kombëtare e Francës ka gjasa të kalojë së shpejti një rezolutë për ndalimin e vellove të fytyrës dhe në muajt që vijnë, do ta bëjë ligj një masë të tillë, thonë deputetët.

Një komision parlamentar që është ngritur për çështjen, i cili e ka diskutuar atë në kuadër të një debati të gjerë publik mbi identitetin kombëtar, pritet të publikojë rekomandimet e tij të martën që vjen.

Le Figaro shkruante të premten se deputetët parlamentarë kanë vendosur kundër një ndalimi kombëtar të perçeve, por ato do të ndaloheshin vetëm në ndërtesa publike si spitalet, shkollat apo transporti publik, duke cituar për këtë një tekst të vendimit të komisionit të konsultuar nga e përditshmja franceze.

"Kjo masë do t’i detyrojë njerëzit që jo vetëm të tregojnë fytyrën e tyre gjatë hyrjes në një ndërtesë publike por edhe që fytyra e tyre të jetë e zbuluar gjatë gjithë kësaj kohe," citohej të shkruhej në dokument nga Le Figaro.

Presidenti Nicolas Sarkozy i ka quajtur perçet një ofendim ndaj dinjitetit të gruas që nuk është i mirëpritur në Francë, ku jetojnë rreth 5 milionë myslimanë. Janë më pak se 2,000 që mbajnë këto perçe, të njohura në vend me emrin ‘burka’ megjithëse shumica e tyre janë ‘nikabë’ të Lindjes së Mesme që tregojnë vetëm sytë.

"Po, unë jam për një ndalesë ligjore ndaj perçeve, të cilat nuk kanë vend në Francë, një vend ku gratë kanë pasur të drejtën e votës që prej vitit 1945," tha Hassen Chalghoumi, 36 vjeçar, për të përditshmen Le Parisien.

Chalghoumi, i cili ka marrë dhe kërcënime me vdekje për promovimin e tij të dilogut me hebrenjtë, ka thënë se vellot e plota të fytyrës nuk kishin baza tek Islami dhe se ato : i përkisnin një minoriteti minimal të traditës që reflekton një ideologji jo të denjë për besimin mysliman."

"Velloja është një burg për gruan, një mjet seksit dominimi dhe indoktrinimi Islamist," tha Chalghoumi, xhamia e të cilit qëndron në Drancy, në vendin ku më parë ka qenë një kamp burgu i kohës së luftës, nga ku hebrenjtë transportoheshin për në kampet naziste të përqendrimit.

Chalghoumi kritikoi disa nga masat më të ashpra të marra nga disa deputetë konservatorë, si përshembull vendosja e gjobave apo heqja e mbështetjes sociale për fëmijët për gratë me perçe.

Por hoxha me origjinë nga Tunizia, i cili është një qytetar francez i natyralizuar, ishte dakord se Franca nuk duhet të japë qytetarinë për gratë emigrante që mbulojnë fytyrën e tyre.

"Të marrësh kombësinë franceze do të thotë të bëhesh pjesë e shoqërisë, në shkollë e në punë," tha ai.

"Me atë copë pëlhurë mbi fytyrën e tyre, çfarë mund të kemi ne të përbashkët me këto gra? Nëse ato duan të mbajnë vellon, le të shkojnë në vende ku kjo sjellje është traditë si Arabia Saudite."

Liderët myslimanë francezë kundërshtojnë masën e ndalimit, ashtu si dhe disa politikanë të vendit, duke thënë se ajo do t’i diferenconte myslimanët dhe ndoshta do të thyente konventat e të drejtave të njeriut.









E Shtune, 23 Janar 2010