Italia së shpejti do të kërkojë ndalimin e vellos së plotë myslimane të fytyrës, duke përfituar nga një debat i ngjashëm në Francë, ku Presidenti Nikolas Sarkozi e ka përshkruar perçen si jo të mirëpritur dhe ka nxitur legjislatorët të votojnë një ligj që e kufizon atë.

Ministrja e mundësive të barabarta, Mara Carfagna, tha se qeveria italiane do të ndjekë shumë shpejt hapat e Francës, duke i dhënë jetë të paktën katër drafteve të këtij lloji mbi perçet, që tashmë qarkullojnë në komitetet parlamentare.

"Jam plotësisht dakord me iniciativën franceze, e cila mendoj se do të nxisë shtete të tjera Europiane e kështu dhe Italinë, të vërë në veprim ligje mbi këtë çështje",- tha kësaj jave Carfagna.

"Kjo është për një betejë “sacrosanct-e” në mbrojtje të dinjitetit dhe të drejtave të grave emigrante. Është duke u studiuar një ligj që do të ndalojë përdorimin e perçeve apo vellove të tjera të fytyrës, që nuk janë simbole fetare – dhe nuk jemi ne që e themi këtë, por autoritetet më të larta të botës myslimane, si hoxhët e Kairos apo të Parisit."

Komentet e saj erdhën pasi një panel parlamentar francez nxiti kësaj jave që Asambleja Kombëtare të kalonte rezolutën që dënonte vellon e plotë të fytyrës, duke e mbështetur këtë me ndalimin për gratë që e veshin atë.

Kritikët thonë se perçja, velloja e plotë me një çarje për sytë, është simbol i nënshtrimit të grave.

Në Itali, iniciativa ka tërhequr shumë mbështetje nga grupimet e të djathtës ekstreme e anti-emigrante si Lega Nord, që bën pjesë në koalicionin e qeverisë konservatore të kryeministrit Silvio Berluskoni, megjithëse dhe partitë opozitare e kanë duartrokitur atë.

Në Italinë thellësisht katolike – ku dhe vendimi i gjykatës evropiane për heqjen e kryqeve nga klasat e shkollës shkaktoi një zemërim kombëtar – vetëm disa qytete të mëdha të veriut kanë tentuar të përforcojnë ndalimin për perçet, që më pas është anuluar.

Iniciativa pretendon të ketë mbështetjen e shumicës së italianëve. Një sondazh i agjencisë SWG tregoi se 71 për qind e popullsisë ishin në favor të vellos së plotë të fytyrës.



"Të ecësh nën ujë"



Megjithatë, ashtu si në Francë, çështja ka provokuar një debat të ashpër në Itali për faktin nëse ky ligj është vërtet i nevojshëm. Politikanët e majtë, e madje dhe disa nga koalicioni i Berluskonit dyshojnë se legjislacioni mund të përfundojë duke dhënë rezultate negative.

"Jam e bindur se perçja është një burg dhe një formë e dominimit të mashkullit",- tha senatorja e majtë Vittoria Franco. "Pasi të kemi thënë këtë, përsëri mendoj se do të ishte i gabuar ndalimi i saj pasi do të ishte një ndërhyrje abstrakte dhe nuk do të ndihmonte në emancipimin e grave."

Ndërsa të tjerë thonë se perçja është gjithashtu ilegale sipas aktit të anti-terrorizmit të vitit 1975, që ndalon paraqitjen në publik me fytyrë të mbuluar.

Por ligjvënësja konservatore Souad Sbai, e cila ka propozuar amendimin e ligjit të vitit 1975, që në mënyrë specifike aty të përjashtohet perçja, thotë se duhet të dërgohet një mesazh i qartë për të bindur gratë myslimane të mos mbajnë veshje të tilla.

"Nëse nuk e ndalojmë atë tani, nesër do të kemi edhe më shumë gra me perçe në fytyrë",- tha Sbai, me origjinë marokene, për Reuters. "Çdo ditë numri i grave që e veshin atë rritet. Vetëm po të shkojmë në Bresha, Bergamo apo Milano, çdo treg është plot me gra që veshin perçe."

Ajo thotë se më shumë se 1.000 gra në Itali mbajnë perçe të plotë të fytyrës, edhe pse Ahmad Gianpiero Vincenzo, kryetar i grupit Intelektualët Italianë Myslimanë, thotë se jo më shumë se 100 gra e mbajnë.

Grupimet myslimane në Itali këshillojnë gratë kundër mbajtjes së perçeve, por janë të mendimit se sjellja në fuqi e një ligji për këtë do të ishte një tentativë për kushtëzimin e zgjedhjeve personale.

Sido që të jetë, mbajtëset e perçeve, nuk duket se ecin shumë përpara në Itali, thotë një reportere e të përditshmes La Repubblica. Duke u maskuar me një perçe, ajo na tregon sesi nuk ishte lejuar të merrte libra në bibliotekë dhe ishte detyruar të largohej nga ndërtesat lokale qeveritare.

"Po të ecësh rreth Milanos me perçe, të duket sikur po ecën nën ujë",- shkruante ajo në fund të artikullit në gazetën me tendencë të majtë.



E Shtune, 30 Janar 2010