Shqipëria nuk përbën problem për shtetasit që kërkojnë azil në vendet e BE-së për shkak të sigurisë së kufijve dhe zyrave të migracionit që disponon.

Ministri i Brendshëm, z. Lulzim Basha, deklaroi dje nga qyteti i Elbasanit se Shqipëria garanton standarde njësoj si vendet e tjera të Bashkimit Evropian.Gjatë ceremonisë së përurimit të Zyrës së Migracionit pranë Drejtorisë së Policisë së Qarkut Elbasan, Basha tha se standardi i investimit në këtë zyrë migracioni nuk lë asgjë për të dëshiruar, krahasuar me standardin e zyrave analoge në vendet e hapësirës së BE apo të zonës Schengen.

“Është një tregues tjetër i qartë i standardit që ka arritur sot Policia Kufitare dhe Migracionit, që shkon përtej asaj që kërkon udhërrëfyesi për liberalizimin e vizave. Është një tregues i qartë i vullnetit të qeverisë shqiptare dhe kapaciteteve tona nëpërmjet Policisë Kufitare dhe Migracionit për të trajtuar çdo kërkesë për azil në mënyrë të rregullt sipas legjislacionit në fuqi në Shqipëri, sipas normave e standardeve europiane dhe sipas të gjithë standardeve ndërkombëtare”,- deklaroi Basha.

Ministri tha se së shpejti do të përurohet një qendër moderne në Durrës për azilantët me qëndrim të parregullt.

Sipas tij, këto janë prova të qarta se Shqipëria jo vetëm nuk përbën një burim apo problem për sa u takon shtetasve të tretë që mund të kërkojnë azil në vendet e BE, por është qartësisht e përgatitur të trajtojë me standarde europiane azilantët e huaj që kërkojnë azil në Republikën e Shqipërisë.





E Premte, 12 Mars 2010